أنا أسف يا جماعه سامحوني مكنتش اعرف أتاري الدين تجاره وزيه زي البضاعه والتجاره شطاره ومتباعه متباعه للي باع واللي اشترى واللي تاجر واللي افترى وكل من هب ودب يطلع يشتم ويسب والأخلاق مالهاش سعر ولله الأمر يوم تأتي الساعه ولو عينك هاترف تلقى بضاعه ع الرف وكل سؤال له جواب ولكل فعله عتاب ودقون الناس بياعه أنا أسف يا جماعه الناس معندهاش مناعه م اللي بيتقال واللي بيتحكي كل واحد له موال يغنيه ويشتكي وفيه فتاوى للشكاوى من عينة القهوه في المعازي وانا آسف يا ساده نقدمها بالسكر وللا نخليها ساده وييجي رد موش ع البال لا هو معقول ولا منطقي عقول متحجره ورجال متنمره بفكر سارح، وكلام جارح لتحلية البضاعه وريح الزبون واللي يكون يكون مفيش مكنون وكلها متذاعه ع الهوا وفي الإذاعه وكله بيتاجر على عينك يا تاجر عملوا الدين شماعه بكل جساره وشجاعه يعلقوا عليها هموم الناس ويردوا بكل وضاعه على مواضيع حساسه لا يهمهم شرف ولا خلاعه معتبرين جهنم فزاعه لكل كلمه وكل حاجه على اعتبار الناس محتاجه لعشماوي ومعاه عصايه يضرب ويؤدب الرعايا لأسباب خداعه موش كل اللي ركع على سجاده بيعرف ربنا موش دي العباده دي مظاهر وربما عاده وصدقوني يا جماعه القنوات الفضائحيه مليانه إباحيه وعجباها فتنة القضيه عن الكبير والرضاعه متابعاها على طول في الميدان أو القاعه مادام الناس بتتابع والفلوس بالكوم والحلقات متباعه وانا اللي آسف يا جماعه ع المواطنه والسلام واهو كله كلام بس طلع إشاعه زي المحبه والوئام والتسامح والوداعه وسلملي ع الحيطان اللي بيسمعوا بالودان واللي يسمعوه ينسوه ويروح لك في خبر كان الجو مبقاش نضيف ولسه هانقول ونضيف وللا نسكت يا جماعه ع التواطؤ واللكاعه والتطاول والبشاعه صدقوني يا جماعه لدنيا الظلم ساعه ودنيا الحق لآخر ساعه
