أصل وفصل الحكاية؟! بقالنا حوالي اكثر من 70 سنة وكل اللي نعرفه عنه تصلب الشرايين Atherosclerosis، اللي هو السبب الرئيسي في الأزمات القلبية وسكتات الدماغية التي تتربع على عرش أكثر الأمراض التي تودي بحياة البني أدمين إلى الآن حوالي مليون نعم 1,000,000 بني أدم في أمريكا يموت سنويا مثلا من مجمل حوالي أكثر من3 مليون مواطن أمريكي بيموتوا سنويا من جميع أسباب الموت، وأصبحت مسلمات -ما حدش ينفع يحاول يعرف أصلها وفصلها- إنك لو بتاكل دهون مشبعة هيزيد عندك الدهون الكلية والضارة في الدم، ولما تزيد في الدم يحصل تصلب شرايين ويجيلك مرض القلب، صح؟! ده بقي اللي أنا جاي اكلمكم فيه النهارده! ليه بقي "موديل قديم"؟! حاجة غريبة جدا!! بنغير تليفوناتنا وعربياتنا وأجهزة كتير في بيوتنا كل كام سنة، وأحيانا كل سنة آيفون جديد ولا أندرويد جديد! لانه بقي "موديل قديم" وعدى عليهم كام سنة! والغريب أن الكلام اللي أنا قلته فوق ده عن الكولسترول المرتفع في الدم وبالذات الكوليسترول الكلي والضار، وموضوع أنهم بسبب زيادتهم فقط تحدث أمراض تصلب الشرايين ده كلام مش بس موديل قديم! ده قديم قوي قوي! مش من 10 سنين مثلا، لأ! ولا عدى عليه جيل كامل! لأ ده من حوالي أكثر من 70 سنة من خمسينيات وستينيات القرن السابق! مين المسؤول؟! العالِم والمسؤول عن هذا الفكر في العالم كله كان اسمه أنسل كيز Ancel Keys وماكانش طبيب أصلاً! العالِم ده هو اللي بسببه العالم كله لغاية دلوقتي مصدق خرافة أن الدهون المشبعة Saturated Fats بتاعت الزبدة والسمنة والفراخ واللحمة والبيض والأكل الحيواني عموما هي اللي بترفع كولسترول الدم! أيوه حضرتك قريت صح! "خرافة" وكلام قديم قوي قوي قوي! وإن كوليسترول الدم الكلي واللي ظلموه وسموه "الضار" الـــ LDL ده شرير الرواية villain طبعا ومن شأنه وتخصصه وهوايته خربشة وتدمير وتعوير جدار الشرايين اللي في حالها (مع إنه لأسباب غير مفهومة ما يعرفش يعمل كده في جدار الأوردة مثلا!! فكرت فيها، غريبة جدا!) وبالتالي دخوله في داخل جدار الشريان! مما يؤدي لتصلب الشرايين ومنها التاجية وفي المخ مما يؤدي لأزمات قلبية وسكتات دماغية! دية بيسموها دلوقتي نظرية تصلب الشرايين بسبب الاكل Diet Heart Disease Hypothesis. أكيد في حاجة غلط! تخيلوا يا حضرات إنه الآن ده كلام بيتقال عليه في الوسط العلمي )إحم إحم غير الممول فقط ( موديل قديم! وأبعد ما يكون عند الحقيقة أو الثوابت العلمية Scientific Axioms! أنسل كيز حارب مش بس علماء أمريكا، بل العالم أجمع بكل ما فيه من خيلاء التي لا يتمتع بها وليست من شيم العلماء، وقد كان سياسيا محنكا، فوصل لأعلى الشخصيات ذوي النفوذ من خمسينات إلى سبعينات القرن العشرين! بلا شك سيطر سيطرة تامة على الساحة لأكثر من ٣٠-٤٠ عام تقريبا وكانت هذه الفترة كافية مع بذخ التمويل الحكومي أولا وبعدها من شركات الأكل والأدوية وذوي المصالح الخاصة، لترسيخ هذا المبدأ في عقول الملايين من الأمريكيين وبعدها انتشرت كما النار في هشيم مليارات العالم! لدرجة أقنعونا باستعمال الزيوت النباتية مثل زيت الذرة والكانولا والصويا وعباد الشمس من منطلق خفض الكولسترول"الضار" LDL ونجحت الفكرة والعالم كله قلل وبطل تقريبا اكل زمان المليان دهون مشبعة واتعلمنا نأكل "صحي بقي" اكل صناعي مليان دهون نباتية -نعرف وفهمنا دلوقتي- إنها ملهبة ومسرطنة ورغم انخفاض الكوليسترول اللي خلونا نحس ان مرض القلب هيختفي في غضون عقود قليلة!! هل اختفى؟ لأ! ده زاد وما زال يحصد تقريبا ٣٠٪ من نسبة الموت في امريكا وباقي العالم رغم إننا سمعنا الكلام ونفذناه بحذافيره؟! مش ممكن في حاجة غلط!! إحتكار الحقيقة: والعلماء اللي كانوا موجودين عالساحة في وقتها لو حاولوا يتكلموا عن اي نظرية تانية ممكن تكون السبب الحقيقي أو آخر على الأقل يعني! من أسباب تصلب الشرايين غير دهون الأكل المشبعة ودهون الدم الضارة! حاربهم كلهم أنسل كيز بكل قوة وشراسة ونفوذ الي حد تعييرهم في الوسط العلمي كأغبياء! آنذاك! وأصبح بمثابة انتحارا مهنيا تحدي هذا العالم الأمريكي! وبالعامية المصرية المعبرة "لو عايز تخرب بيتك وتضيع مستقبلك" حاول تتحداه وتتحدى نظريته! وبالفعل عمل كده في كل من حاول تصحيح مفاهيمه الخاطئة! مسلمات وممنوع اللمس Untouchable واللي كانوا يحاولوا البحث عن سبب آخر لتصلب الشرايين غير دهون الدم والأكل -لعدم اقتناعهم بالنظرية لوجود أبحاث تناقض هذا في وقتها- غرقهم وحاربهم وخلاهم أضحوكة الوسط "العلمي"!! العالم ده عمل بحث وسماه بحث السبع بلدان The Seven Countries Study والغريب إن احنا نعرف دلوقتي أن هو بدأ البحث بــــ 22 بلد لكن حضرته لما النتائج من الـــ 15 التانيين ما مشيتش على هواه وأثبتت العكس أحيانا! لأنه ما كانش عامل بحث بيدور على الحقيقة! لأ! عامل بحث بيدور على إزاي يثبت نظريته ان الدهون المشبعة وكوليسترول الدم هم السبب في تصلب الشرايين وأمراض ناتجة عنها! ودية طريقة بحث غير علمية ولا بها أي مصداقية اطلاقاً! وده اللي حصل! وكاااانت! والعالم صدقه! وانت لسه مصدقه وكليات الطب مصدقاه!! أنا لأ! والعديد من الأبحاث أثبتت انه على خطأ! بس للأسف زي مابيقولوا "الفأس جات في الرأس" وأصبحت مسلمات وماحدش عارف يغيرها وياويل اللي يحاول يلمسها Untouchable!. ليه مش منطقي الكلام؟! By Design هل تعرف عزيزي القاريء أن المخ يتكون من حوالي ٦٠٪ دهون منها كولسترول وأوميجا ٣ وأوميجا ٦، وأن المخ يقوم بتكوين هذه الدهون دون احتياج لدهون الاكل! وأن الكبد قادر أن يكون على الاقل 3000مجم كوليسترول يوميا لو لم نأكل أي دهون تماما! إزاااي بقي قدروا يقنعونا ان شيء الكبد طبيعيا يكونها والمخ أيضًا كل ثانية "ضارة" وقاتله! مش عارف أقول إيه غير "كفاية ضحك على الذقون بقي!" الدهون اللي بيكونها الجسم طبيعيا صحية، حتى لو كان اسمها كوليسترول وكوليسترول LDL "ضار" لأن ربنا لما خلق المخ والكبد وكل خلايا الجسم تقريبا بتكون كوليسترول! مستحيل يخليهم يعملوا حاجة تضرنا طبيعيا أصلا! مش ممكن تبقى مؤذية كديزاين! By Design! مين السبب في الحريق! فين المطافي!؟ ومرت العقود وحاول علماء آخرون كسر القاعدة وتصحيح المفاهيم الخاطئة والبحث عن الحقيقة لأنه احيانا كما تقول الحكمة "ممكن يبقى مش اللي ما تعرفهوش هو اكتر حاجة تاعباك ومدمراك، لكن اللي انت عارفه كويس إنه صح، بس هو في الواقع غلط" وحاول الكثيرون البحث في نظريات أخرى لتصلب الشرايين غير ارتفاع كولسترول الدم؟ وأهم نظريتين أقرب للحقيقة علميا -وهذا لشدة لغموض الموضوع إلى هذه اللحظة- ممكن التهابات بجدار الشريان مثلا؟ أو تخثر الدم وجلطات صغيرة داخل جدار الشريان على مدار سنين طويلة بسبب أسلوب حياة غير صحي وأحيانا عوامل جينات؟ ونعرف الآن أن وجود الكوليستيرول وهو من مكونات الدم أصلا داخل تصلب الشرايين ده مش معناه انه هو السبب؟ ده زي ما يكون مصدقين أن وجود رجال المطافي في بيت بيتحرق معناه إنهم هم اللي ابتدوا الحريق! وهم في الواقع بيحاولوا لاهثين إطفاء نار الحريق! نعم "وصلت للدرجة دية" مش بس مش السبب! ده ممكن يبقى محاولة من الجسم لاحتواء الحريق بكل ما يملك حتى من كوليسترول! لأن لو حضرتك ما تعرفش من وظائف الكوليسترول الضار LDL أنه مضاد أكسدة! من بيفكر بره الصندوق؟! ولكن من أكثر من 20 عام الآن وفي نهاية القرن السابق ثبت علميا ولا يسعني المجال هنا في هذه المقالة "الصغيرة "، لوضع الروابط وأسماء كل العلماء والأطباء المشاهير الأن ومنهم David Diamond و Paul Mason و Ken Berry و Malcolm Kendrick و Nadir Ali لمن يرغب متابعتهم وقراءة كتبهم اللي بره الصندوق خالص اللي حاولوا يفهمونا أن المشكلة مش بس دهون مشبعة وارتفاع الدهون الضارة LDL في الدم وارتفاع الدهون الكلية Total Cholesterol ! وعلى سبيل المثال وجد عند مرضى السكر النوع الثاني ومقاومة الأنسولين ومتلازمة الأيض ارتفاع رهيب في نسب الأزمات القلبية والسكتات الدماغية بمعدلات مرعبة تصل إلى 10 أضعاف معدلات الإصابة الطبيعية -بغض النظر عن رقم الدهون الضارة LDL!- نعم بغض النظر!! مش مهم كام الدهون الضارة بالبلدي! إزاي مش ممكن؟! لأ ممكن! خلينا أفهمكم هم اكتشفوا إيه اكتر!. ليه أكيد في سبب تاني! تعرفوا أن حوالي ٧٥٪ من اللي بيجيلهم أزمات قلبية وسكتات دماغية في المستشفيات عندهم LDL طبيعي! مش عالي يعني؟! وتعرف مثلا أن معظم الناس اللي عندهم ال LDL اللي بيقولوا عليه "ضار" عمرهم ما بيجيلهم أزمات قلبية ولا سكتات دماغية! يا جماعة!؟ فكروا فيها أكيد في حاجة غلط! وأكيد في سبب تاني بلحكاية دية! وأنهم لبسوا الليلة بالعامية المصرية الجميلة للكوليسترول لأسباب واضحة!! مش كده وبس! أشارت الكثير من الأبحاث غالبا غير الممولة المرة دية -على الأقل مش شركة أدوية عايزة تبيع عقار جديد يعني من الآخر! - أن كل ما يزيد الكوليسترول الكلي والعجيب بالذات LDL اللي بيسموه "الضار" بتقل نسب الالتهابات وتنخغفص نسب حدوث أمراض مناعية كثيرة والعدوى بالفيروسات والبكتيريا وبيزيد العمر عموما! نعم بيزيد العمر مع زيادة ال LDL!! ده بحث نرويجي شهير في حوالي 68,000 مشترك في البحث! ومرة تانية مصلحتهم إيه؟! فكر فيها! حجم $$$ المشكلة! والشيطان الأخرس؟! وطبعا المستفيد الرئيسي من هذه النظرية بتاعة الكوليسترول الضار بيعمل تصلب شرايين وعندنا ترسانة Arsenal كاملة من الأدوية اللي بتقلله! رغم ضعف وقدم وهشاشة هذه النظرية الآن! وعلشان تعرف حجم $$$ المشكلة العقار اللي مادته العلمية أتورفاستاتين Atorvastatin كان أول دواء وعقار تتخطى مبيعاته لتكسر حاجز المليار دولار وده من أكثر من عقدين من الزمان! ولكن لازم تعرف أنه دلوقتي تخطى وكسر حاجز التريليون دولار في الكام سنة اللي فاتوا! نعم 1000 مليار دولار! الرقم ده مرعب! ده 12 صفر حضرتك! 1,000,000,000,000 ده أكثر من ضعف الدخل القومي السنوي GDP لبلد كبيرة زي مصر ويقترب من الدخل القومي السعودي السنوي وحوالي نصف الدخل القومي السنوي لبريطانيا العظمى! عرفت حجم المشكلة $$$ ما حدش عارف "يفتح بقه" وربنا يسترعلينا وعلى ولايانا بقي لأن الساكت عن الحق شيطان أخرس!. الدهون الثلاثية TG والنافعة HDL! ومن أعجب ما في الأمر أن الدهون الثلاثية TG التي لا يتكلم عنها أحد وهي علميا نعرف الآن أن ارتفاعها فوق رقم 100 ده غير طبيعي وفوق 150 مؤشر أهم بكتير من الكوليسترول الضار LDL وقد يعني زيادة استعمال السكر المضاف والخبز والأكل الصناعي مش دهون مشبعة!! وقد يشير إلى درجة معينة من مقاومة الأنسولين IR -أصل كل الشرور والأمراض الحديثة على رأي دكتور بنچامين بيكمان Benjamin Bikman الأمريكي من ولاية يوتا Utah من أشهر علماء الدهون في العالم الآن- ومشكلة أخرى إذا كان الكوليسترول النافع HDL أقل من 50 وفي البعض أل من 30! وده أهم من الكوليسترول الضار LDL ورقمه بكثير. “مــن الآخــــر”: و”من الآخر” على قولة الأستاذ وائل لطف الله رئيس تحرير جريدة كاريزما في برنامجه اللطيف جداً على السوشيال ميديا “من الآخر” نسبة الدهون الثلاثية TG إلى الكوليسترول HDL النافع (TG/HDL) مؤشر أهم بكثير لارتفاع خطر الإصابة بتصلب الشرايين من الكوليسترول الكلي والضار LDL في الدم، وعلى سبيل المثال هناك مرض اسمه ارتفاع الكوليسترول العائلي Familial Hyperlipidemia وهذا المرض به مشكلة في مستقبلات الكوليسترول “الضار” LDL receptors -في جسم البني آدم بالذات في الكبد مما يؤدي في هذه الحالات النادرة اللي حدوثها أقل من 1/500 إلى ارتفاع رهيب في أرقام الكولسترول الضار عادة فوق الـــ 300 مجم وقد يصل لأكثر من 500 مجم وأعلى كمان! وقد كان من المتوقع والمفروض والمنطقي يعني أن هذه النوعية من البشر اللي حظهم وحش جدا والمفروض والمنطقي كان كلهم هيموتوا في عشريناتهم وتلاتيناتهم بقى من الأزمات القلبية والسكتات الدماغية! وده ما حصلش! و ده طلع أبعد ما يكون عن الحقيقة لأن الدراسات والإحصائيات أشارت ان معدل عمرهم طبيعي جدا ولا تعلو نسب الأزمات القلبية والسكتات الدماغية! وده ما حصلش وأمراض القلب عندهم زيهم زي باقي الناس تقريبا وأكثر من نصفهم عمرهم ما بيجيلهم هذا المرض! قسمة TG/HDL أقل من 1.7 يا بختك!؟ إذا كانت نسبة الدهون الثلاثية TG إلى الدهون النافعة HDL في تحليل الدم أقل من 1.7 فهذا يعني احتمال ضئيل جدا في حدوث تصلب شرايين والأزمات القلبية والسكتات الدماغية!! بغض النظر!! خليني أقول تاني!! بغض النظر عن ارتفاع الكولسترول الكلي والضار! مش ممكن! لأ ممكن ودية الحقيقة المرة اللي مش بندرسها في كليات الطب! ولو النسبة فوق 3 ده سيء ومعناه ارتفاع حاد في نسب الأزمات القلبية والسكتات الدماغية ولو فوق 5 وأحيانا ٢٠ و٣٠ النسبة تخيلوا ده معناه إيه في زيادة المرض! بلا شك الاتنين دول أهم بكتير في قراءة تحليلك بتاع الكوليسترول عن فقط رقم الكوليسترول الضار اللي معظمنا فاكرينه أهم حاجة في الدنيا! وطلع كلام فاضي! ومش ١٠٠٪ صح، حتى لو كان فيه بعض الصحة مثلا زيادة طفيفة في حدوث الأزمات القلبية والسكتات الدماغية مع زيادة الكولسترول الضار وبالذات ApoB وحاجة ثانية اسمها Small Dense LDL واحد تاني دلوقتي اسمه Apo LipoProtein (a) ودوله لو زادو مش كويس طبعا بس نسبة الخطر الناجمة عن زيادتهم تتضاءل جدا جدا أمام وجود مرض زي السكر النوع الثاني والتدخين والسمنة وارتفاع الضغط ومقاومة الإنسولين! دول وجودهم معناه أسلوب حياة وأكل غير صحي وغالبا مصحوب بزيادة في ارقام الدهون الثلاثية TG ونقص في الدهون النافعة HDL !! وده محتاج تغيير حياة مش بس عقار ودوا! بس السؤال تغيير أسلوب حياة ده حضراتكم بيجيب فلوس كااام؟! صح ما بيجيبش!! فهمت ليه مافيش كلام كتير في الموضوع ده! ورغم إني من عشاق السوق الحرة والرأسمالية لكن لها عيوبها ومن أهم عيوبها الفلوس بتبقى أهم حاجة في الدنيا مهما كان الثمن! وفي رأيي في الحتة دية الثمن غالي! صحتك!. يا سلام لو ما فيش حاجة اسمها LDL! استنى استنى! دية أمنية كارثية! ده طلع مرض نادر اسمه Abeta Lipo Proteinemia وفيه لا يستطيع الكبد أن يكون الدهون المدعوة ظلما وافتراءا "ضارة" LDL ولو كانت نظرية الدهون الضارة تسبب تصلب الشرايين بهذه البساطة! لكان معناه أن هذه الناس ستعيش للأبد وعمرها ما يجيلها أزمات قلبية ولا سكتات دماغية، ولكن المفاجأة والفاجعة كانت أن ما يحدث على ارض الواقع لهذه الناس هو غريب جدا و مختلف تماما ومناقض لكل ما تعلمناه قديما في كليات الطب عن الدهون الضارة لأن الكثير منهم يموت في أول سنين عمره بسبب التهابات وأمراض قلة المناعة وأمراض أخرى مختلفة ويحدث عند البعض منهم عمى ومن يعيش منهم يعيش على الأكثر إلى العقد الثالث أو الرابع وهذا عجيب جدا لأن هذا المرض بيعمل حاجة يلهث وراءها مليارات الناس على الأرض وهي خفض الكوليسترول الضار تماما! وهذا دليل على أن احنا فاهمين القصة غلط خالص!. أدوية الستاتين Statins ما لها وما عليها: وتلهث شركات الأدوية العقاقير وراء تصنيع أدوية أقوى من سابقة الذكر القديمة الستاتين Statins وطالعة نوعية جديدة أقوى بكثير في خفض الكوليسترول "الضار" اللي عرفنا انه مش لازم دايما "ضار" وقد يكون فعليا بريء براءة الذئب من دم ابن يعقوب! وهناك أدوية جديدة غالية جدا اسمها PCSK9 inhibitors وهذه قادرة أن تخفض الدهون الضارة اللي عرفنا فوايدها دلوقتي ومش دايما ضارة -إلا لو مؤكسدة بتدخين وقلة رياضة وقلة نوم وقلة مضادات أكسدة في اكل صحي وزيادة سكر واكل صناعي، ولوحدها مش ضارة قوي ولازم يبقى مصحوبة ومعاها دهون ثلاثية عالية قوي ودهون نافعة منخفضة قوي وده ممكن علاجه وعكسه بتغيير أسلوب الحياة المذكور أعلاه - والعقاقير الجديدة PCSK9 Inhibitors دية اللي في صورة حقن شهرية وتصل تكلفتها لقرابة 1000 دولار شهريا! وممكن توطي وتخفض الـــ LDL إلى أرقام مخيفة تصل إلى متوسط 26 مجم بدلا عن 90 مجم مع الستاتين القديمة بقي! مع إنهم بيقولوا بيزود عمر البني آدم! لكن طلع الساتين دية ممكن تطيل عمر الإنسان ٤ أيام فقط مع استعمال ٥ سنين مثلا! وطبعا مع كل عيوبها! ودية دراسات مدفوعة! ومع ذلك ٤ أيام فقط لكل ٥ سنين! "إنت أكيد بتهرج"! والغريب مع الأدوية الأحدث ومع هذا الإنخفاض الرهيب في الـــ LDL للعشرينات!! على حساب زيادة في العدوى وضعف في المناعة ومشاكل في العضلات وآلام وزيادة في نسب حدوث السكر النوع الثاني وزيادة الموت من جميع الأسباب! نعم ممكن ندفع الافات الدولارات ونزود نسبة الموت من حاجات تانية بس أهم حاجة بقي مش مرض القلب!. بتشتغل إزاي طيب الأدوية دية؟! وفهمنا من كام عقد أن بعض أدوية الكوليسترول التي تعمل فقط ونعرف الآن كيفية عملها ليس فقط بسبب خفض الدهون الضارة اللي مش دايما ضارة زي ما انت المفروض فهمت دلوقتي! لأنها مش أهم حاجة بتعملها ولكنها بطرق أخرى تاثير اسمه Pleiotropic Effect وهو أن هذه الأدوية التي تنتهي بستاتين Statin لها مميزات ضد تخثر الدم يعني مسيلة للدم مثل الأسبرين -مما يثبت صحة أحدث وأصح نظرية لتصلب الشرايين الآن وهي الجلطات الصغيرة على مدار السنين داخل جدار الشرايين- في تكوين تصلب الشرايين أو بطريقة أخرى وهي كونها مضادة للالتهابات! ولكن نسب التحسن طفيفة جدا وخفض نسب الأزمات القلبية والسكتات الدماغية طفيفة جدا ولا تقارن بتغيير جذري في أسلوب الحياة الي في غضون أسابيع مش بس بيحسن الأرقام فقط! لأ بتخس وتتخلص من دهون الكبد والضغط ومقاومة الإنسولين والسكري النوع الثاني في خلال أسابيع قليلة! كلام سمعته من مئات ويمكن الافات من متابعي قنوات "تكتوكاية حكاية" بعد تغيير جذري في أسلوب الحياة!. "القصة مش مجرد دهون يا حضرات": ويحضرني في هذا الموقف زي ما كنت بأقول في برنامج "تكتوكاية حكاية" بالنسبة لمرض السمنة وهو بالمناسبة مرض يسبب تصلب الشرايين أضعاف أضعاف نسبة الزيادة مع مجرد ارتفاع في الدهون الضارة LDL مثلا- " القصة مش مجرد سعرات يا حضارات". عايز أقول دلوقتي القصة مش مجرد دهون مشبعة في الاكل وفي الدم يا حضارات- خصوصا لما نعرف علميا الآن أن الدهون المشبعة الموجودة في البيض وفي اللحوم والفراخ ليس لها علاقة اطلاقاً بارتفاع الدهون الضارة في الدم! وعجبي! والغريب أن أنواع معينة من الدايت وتغيير أسلوب الحياة زي الدايت منخفض الكربوهيدرات Low Carb والكيتو Keto والكارنيفور Carnivore والأخير ده معناه لحوم حمرا بس وتترأس هذه الحركة ميكيلا بيترسون Michaila Peterson اللي عرفت تتخلص من كل أمراضها المناعية بأكل لحوم وبس بعد ما فشلت كل حاجة تاني!! ودول عموما أنواع من الدايت مرتفعة البروتينات وبالذات الدهون الحيوانية جدا قد تصل لــــ %80 مع الكيتو مثلا -وهو مش أروع أنواع الأكل الصحي بس بيخليك توقف سكر واكل صناعي تماما- ومليء بالدهون المشبعة جدا ولكنها أنواع دايت ساعدت الملايين على التخلص من السمنة و دهون الكبد ومقاومة الأنسولين والسكر النوع الثاني وساعدت على انخفاض مؤشرات الالتهابات بمختلف أنواعها، وأهمها CRP ومرة أخرى بغض النظر عما يحدث في عالم الكوليسترول الضار LDL، لأنه أحيانا مع هذه التغيرات الجذرية في أسلوب الحياة قد ينخفض وقد يثبت وقد يعلو! ولكن مصحوب بغض النظر مع هذه التغييرات في ارقام الكوليسترول الضار LDL ! بانخفاض حاد غريب مذهل رائع في الأزمات القلبية والسكتات الدماغية يكفي أنك تتخلص من مرض السكر النوع الثاني في خلال أسابيع وأحيانا أيام مع الدايت ده!! بردو كلام ما بيجيبش فلوس! بس المهم بيجيب صحة لحضراتكم! الحل إيه؟ ! يعني إيه تغيير أسلوب حياة؟! يعني منع الزيوت النباتية تماما من كانولا وصويا وذرة وبذرة القطن وعباد الشمس والرجوع للطبيعي الزبدة البلدي والسمنة البلدي وعدم الخوف من البيض البلدي وهو أروع أكل مغذي ممكن تأكله وهيحسن نوعية الكوليسترول بغض النظر عن الأرقام وهيقلل الدهون الثلاثية ويزود الدهون النافعة ومش فارق معايا عمل إيه في الدهون "الضارة" اللي المفروض دلوقتي أنتم فهمته حقيقتها! وكشفنا الستار عن أمسخ مسرحية هزلية في تاريخ الطب وشفنا فضايح وراء الكواليس!!! وما تنساش الحركة بركة والتخلص من ستريس الحياة الذي من شأنه رفع الكورتيزول Cortisol وده بيسبب مقاومة الأنسولين، ولازم التعرض للشمس بدرجة كافية على الأقل نصف ساعة يوميا وبيقولوا علميا ده لوحده يضيف لعمر البني آدم سنوات وصحة! -والأعمار بيد الله طبعا- ومش معنى كده ننسى ان الأكل لازم يبقى مليان مش بس دهون صحية وكربوهيدرات صحية من خضروات وبقول وفواكة ومكسرات والقليل من الحبوب الكاملة وبذور صحية، لكن اكل غني بالفيتامينات والمعادن ومضادات الأكسدة والبروبيوتيك والألياف و "من الآخر" أكل زمااان الطبيعي ١٠٠٪ دون تصنيع وتعليب وتغيير ومواد حافظة ومضادات حيوية وإضافات من ألوان صناعية وهرمونات ومكسبات طعم "مخسرات صحة"! ولابد اكل السلطات الخضراء بالخل بزيت الزيتون بالبهارات قبل أكل البروتين والدهون لو هتاكل فواكة خليها آخر الوجبة وده ترتيب الاكل الصح! ولا ننسى دور الصيام بالماء الرائع في التخلص من معظم أمراض العصر من ضغط وسكر ثاني ودهون الدم غير الصحية ومقاومة إنسولين وسمنة والزهايمر ودهون الكبد وحتى الكثير من السرطانات والأمراض المناعية وهذا لذكر القليل وليس للحصر طبعا!. اعذرني عزيزي القارئ على بعض المصطلحات العلمية لو الموضوع كان معقدا، ولكن أحب أن أشير أن هذه المقالة التي بها حاولت جاهدا بطريقة أو بأخرى تلخيص عشرات الكتب ومئات المقالات ومئات المحاضرات في مقالة واحدة! وهو يصعب جدا التأني به ولكن كل ما أرجوه وأصبو إليه هو محاولة تغيير فكرنا القديم قوي عن أن الدهون المشبعة هي سبب الأزمات القلبية والسكتات الدماغية، وان أفضل وسيلة لخفض نسب هذه الأمراض هي فقط العقاقير الغالية القديم منها والحديث الغالي والرخيص! ومش هدفي أن أنت توقف الدواء ولازم تناقش مع طبيبك! ولكن هدفي بكل بساطة وبكل وضوح إن الأدوية ديه عيوبها ممكن تبقى للبعض أكثر من مميزاتها، ولكن ليس هذا فحسب من أهم الأشياء التي أريد أن أشير إليها هي أن الناس تعتمد على القرص والكبسولة وهذا قد يخفض فعلا من معدلات حدوث تصلب الشرايين والأزمات القلبية والسكتات الدماغية عند البعض في حالات منتقاه بنسب طفيفة في بعض الأبحاث التي أشارت أن هذا يحدث فقط إذا كانت الناس التي تتناول هذه العقاقير تأخذها مع وجود ارتفاع شديد في الكوليسترول "الضار" بشرط وفقط في حالة وجود ارتفاع في الدهون الثلاثية وانخفاض في الدهون النافعة ودول ممكن تحسنهم جدا دون عقاقير والأرقام أفضل! لأنهم دول لو كانوا طبيعيين يعني دهون الثلاثية غير مرتفعة والدهون النافعة غير منخفضة يعني الأرقام مثلا دهون نافعة HDL فوق 60 ويفضل 70 و80 وهذا ينجم عن الرياضة والأكل الصحي والنوم الجيد وقلة مؤكسدات ومنع سكريات مضافة وعصاير وأكل صناعي وأن الدهون الثلاثية TG لا تتخطى الــ 150 ويفضل أن تكون تحت الــ 100 مجم وكما ذكرت أعلاه أنه لو النسبة 1.7 (قسمة الــ TG/HDL) صعب جدا يجيلك تصلب شرايين بغض النظر عن رقم الدهون اللي ظلموها وسموها ضارة! بصراحة أهم بكثير ويعكسوا عايش حياتك إزاي وأسلوب حياتك من رياضة ونوم وعدم تدخين واكل صحي طبيعي! وده أروع تغيير في أسلوب الحياة نرجع نأكل زي زمان زي ما كان جد جدك بياكل، وده "من الآخر"! المقال بقلم: دكتور باسم أيوب، المحامي الحاضر والمترافع عن أكثر دهون مظلومة في الدنيا الدهون الضارة LDL. ملحوظة مهمة: لابد الرجوع لطبيبك الخاص في أي قرارات طبية علاجية دوائية أسلوب حياتيه وهذا المقالة مادة علمية نعم لكن تثقيفية فقط! وأخلي مسئوليتي بصفة كاملة وهذه معلومات عامة تثقيفية لا أكثر ولا أقل!.
