بصمه قد تكون بلون النور .. وقد تكون بطعم النار .. لكنها بصمه حضرات القرّاء الاعزاء حضرات الجمهور السيدات والساده الحضور أحب أعرفكم بنفسي انا اسمي .. انا اسمي !! ايه ؟ .... مش فاكر استنوا حاقولهولكم انا فاكره علي فكره انا كاتبه في البزابورت وف بطاقتي حتي ديانتي ايوه ديانتي، سألوني عليها مش فاهم ليه !! مش عارف تفرق وياهم ايه بس كتبته كان ممكن أغش اكتب ميم وانا أصلاً سين مين راح يدخل قلبي ويعرف انا مين ؟ فعلاً حمقي ومتخلفين علي فكره .. انا مش مسطول انا بس يادوب مبسوط وانتم حضرات القرّاء حضرات الجمهور مظبوط ؟ اسمي لسه ناسيه من كتر الهموم من كتر الغيوم من كتر ماتوهوني من كتر ماغربوني عن اصلي وعن جذوري بيحاولوا يقلعوني فصيلة دمي وبصمتي بيحاولوا يزوروها بالكذب عرّبوها لكن كيمت ف دمي ابويا وامي دمعتي وبسمتي هويتي وبصمتي ما علينا .. حضرات الجمهور الحضور كل اللي انا فاكره ان انا مهنتي سياف عند الملك قصدي اللي كان ملك وهو نايم سرقوه سرقوا الغطا ...... عروه ومش كفايه اللي حصل من ذكاوته ومن طفاسته باع عمته بفحل بصل ايوه.. فحل بصل كان مصنن ياخد مقابل عمته حاجه تسعد معدته من بعدها مابقاش ملك ازاي ملك ينام عريان وازاي اصلاً ينام سامعني يا جناب الجمهور ولا انت كمان حاتنام انا عاوزك تصحي معايا وتفكر اوعي تكون جي تنام وتشخر أو جي تدور علي فرجه وبس حبة نكت ، حدوته ، وشوية هلس انا عاوزك تعصر مخك ممكن نضحك .. آه ملعون ابو النكد واللي وراه بس نفكر تطلع من جوانا الآه عشان نجاوب ع السؤال إياه نهايته احكي لكم الحكايه اصل الحكايه م البدايه شهريار كان حمار ضحكت عليه بنت حوا شهرذاد واللي ذاد وغطي انه أتعود ع الحكاوي الف ليله وليله وآه م الليالي أدمن صاحبنا سمع الحكاوي والنَّاس معاه أدمنوا كتر الغناوي كتر الفتاوي كتر الحكاوي ع النواصي وع الترع وع القهاوي نسيوا العمل وايه اللي لازم يتعمل الشمس غابت والقمر غلبه النعاس من كتر السهر ياناس ، ياشعب ، يابشر اصحوا بقي لاجل النبي ، لأجل البلد لاجل البنت والولد اللي طالعين في زمان النت واحنا قاعدين نعجن ونلت هناك حسبوها فنتوثانيه واحنا لسه ف دنيا تانيه ياايها الانعام الزمان زي الطوفان حايشيل قصاده كل اللي ينام النوم صحيح لذيذ لكن ياجمهوري العزيز آه وآه من أخرته لما يفوت الاوان لما نتوه في ضلمته شهريار راح لعراف البلد بعد التوجه ما أعمته راح يدور ع الغطا وعلي عمته العراف قري له الكف ولف الودع ف أيده لف قاله وشوش الدكر حتي الودع قرفان وشاعر بالضجر العراف حيران قلب الفنجان فتح الفنجان قاله ياجناب السلطان بالافرنجي وبالبلدي طريقك مسدود مسدود ياولدي وعشان تلاقي غطاك وعمتك بعد الحكاوي والفتاوى ما اعمتك لازم تجيب حل السؤال اصل الاجابه هي حل المشكله هي (عنخ ( هي مفتاح الحياه للمعضله اما السؤال .. ازاي بلد حضارته كام الف عام ازاي ينام ؟ وليه الناس غرقانه ف النعاس ؟ بلد مليان بالخير ليه يبات جعان ؟ مين بيسرق لقمته ؟ مين بيكسر همته ؟ امتي البلد يقوم من رقدته من كبوته ، من نكسته ؟ لازم يفوق لازم يعود لهويته هي الغطا والستر وهي قيمته وعمته مصريته قوميته اعذروني .. ماكانش قصدي اعكر مزاجكم اقلق منامكم وأضيع الحجرين لكن لازم نعرف رايحين علي فين بلدنا اتسرق واتعري وضاعت هويته شهريار ياناس اتسرق غطاه وعمته سامحوني ماكانش قصدي كل اللي قلته واللي عدته بس اعمل ايه كتر الحكاوي طبع فينا محكوم علينا كتر الغناوي وكتر الفتاوي والبكا ع اللي راح ع الانفتاح سداح مداح أما بكره !! طنش تعيش تاكل قراقيش كبر دماغك وقول ياباسط تلاقيها هاسط احنا اللي دهنا الهوا دوكو بالفهلوة بيتهوفن نعمل منه شكوكو الي هنا سيداتي سادتي لم يدرك شهرذاد الصباح بل أدركني انا من كثرة الصياح لذلك سأصمت حاسكت وآخد نايبي سكات ما التعلب فات فات وف ديله سبع لفات يعني لازم أتكتم من الالم من غير امل وأسكت عن الكلام المباح والغير مباح بس انا مسرور انا فعلاً مسرور ان أنا فضفضت معاكم .. انا ايه ؟ انا قلت انا ايه ؟ انا قلت ان انا مسرور !! مظبوط انا مسرور السياف مسرور السياف الخواف علي بلده وولده مسرور السياف الغلباوي سيفي قلمي ولساني ولساني حصلتي ياما رماني من فوق ضهر الحكاوي مش قلت لكم ف بداية كلامي انا مش مسطول انا عارف اسمي وعارف نفسي وشايف رسمي مفتاح عنخ وخرطوش عين حورس زهرة لوتس وردي علي ورق البردي ده اصلي انا مسرور بصحيح لكن مش سياف انا بنا وزارع فلاح انا بابدر خير وعواف علي ارضي وبلدي أنا مصري .. أنا مصري.
