أنا والضمير والأنا .. حوار داخلي: الضمير: كل ليل وله آخر والقلب الصافي يخللي العتمه تتاخر الانا :الدولار ، هو اللي بيدخل منه النور هو الباب المسحور الضمير: بالحب تجيب النور ف طبق بنور قد الفرحه ما له آخر الانا: الحب .. حب نفسك مش حب غيرك ، اوعي تبعزق خيرك الضمير: اغزل كل خيوط الفجر وانسجها خيط علي خيط ، وبداخل خيط اعمل بيت الانا: بفلوسك .. بنفوذك مش بخيوط الفجر تقدر تعمل قصر الضمير :اعمل بيت عمران بالخير دفيان بالحب وبالاصحاب الانا: إياك .. ده حايخرج بيتك حايضيع مالك ، خليك انت ف حالك الضمير :الامل الحلو خليه وياك اصل الانسان معجون بالخير الانا: معجون بالخير .. معجون أسنان اوعي تصدق ده كلام ف كلام الضمير: عدو الخير بيحاول يقتل جواك الانسان الانا: خليك بني آدم حيوان الضمير: مش ممكن .. ده إنسان الانا: وحاتفرق ايه بينه وبين الحيوان بيتولد ويموت .. زيه زي الحيوان بياكل ويخلف .. زيه زي الحيوان الحيوان بيشخر وينام.. وده يفضّل قلقان الحيوان آخر روقان .. وده وحده التعبان بصراحه .. مين فيهم حيوان ؟ الضمير: إياك تفضل فارس احزان ازرع ف القلب وف الصحرا اجمل بستان الانا: مش راح يطرح الضمير :بستان الحب ربيع اخضر الانا :اوعي تصدق .. ده هزار عمر الصحرا ما تطرح غير صبار الضمير: دور جواك ع الخير ،. علي حب الغير الانا: ماتدورش الضمير: دور والشمس حاتطلع وتنور وحاتعمل من نبض القلب نغم للحب الانا :نغم للحب ، لغم للحرب حايفرقع فيك ، وياعيني عليك الضمير: انده علي بكره حايجيلك والدنيا تنور قناديلك الانا :ماتندهش الضمير :انده هز الدنيا هز الانا: تهز الدنيا ، تهز وسطك حاتهد حيلك .. قول لضميرك طظ الانسان: يارب يارب انا المخلوق، صنعة ايدك انا الانسان ، ابنك وحبيبك اسمح لي ياربي اشكي لك همي ف لحظة قوه يارب بلاقي ضميري معايا صاحي منور لي خطايا وف لحظة ضعف يارب يبقي الانا يصرخ جوايا وحش آسرني ، ذاللني ،بيستعبدني يارب ساعدني .. فيه لحظه انا محتاجها لحظه مش عارف ايه هي عشان اختار .. ده العمر بخار وحياتنا ف ثانيه ، ف غمضة عين النفس الداخل .. ما بيخرجش النفس الخارج .. ما بيرجعش وانا محتار .. مش قادر اختار بين ضميري والانا ما هم الاتنين انا مشكلتي مش بالزائد.. كانت تتحل مش واحد زائد واحد زائد واحد مشكلتي واحد ف واحد ف واحد بالمنطق والحساب الناتج دايماً واحد روح ف نفس ف جسد إنسان واحد انا والضمير والأنا إنسان واحد
